Stadsdichter Viktor Croux over Oud-Rekem :: Blog

Stadsdichter Viktor Croux over Oud-Rekem

Genomineerd bij de sjoenste dörrepe
Lik Aajt-Rèkem dao te proonke
En as ger ins't Kestiel of de Museumkèrrek bezeuk
Geraok ger al rap ien middeleeuwse gedachte verzoonke

Zoeväöl hoeser en pleintsjes ien dei straote
Doen uch aan het verleije deenke
Pak now de Greunplaats of het Poortgebouw
Juweeltsjes vur ech aandach aan te sjeenke

En as ger ien Distillerie Senden kómp
Dao kint ger ouch nog hiel get liere
Van draank weite ze dao alles vaan
Want vreuger nuttigde ze ouch al good bij 't viere

Zoe mót ger ouch de Ucoverpoort en de Paterskèrrek
Zeker e bezeukske goon bringen
Al zult ger ien dei Paterskèrrek
Now spietig genóg, gein paters mie hure zinge

Dan höb ger nog dei prachtige Rèntmeisterij
En de Brikkebekker dae op ze vootstök steit
Het vreuger Gemeintehoes ien zenne volle luister
En de Doktersapotheek dei daovur nit ónder deit

Zoe e bezeukske aan dit Maaslands Dörrep
Ès dan ouch 'n verrieking vur uch cultureel lève
En den titel " Mooiste Dorp van Vlaanderen "
Dae kinne ze dan ouch zeker aan " Aajt-Rèkem " gève

Gepubliceerd op de website van het Belang Van Limburg

« naar overzicht